كل سنه و صوت الأمه صحافه عره و الصحفيين بتوعها حراميه

صور الموضوع المسروق

كان نفسى أشتم و أقول اللى فى نفسى كان نفسى أبقى سفلة عشان أعرف أقول الى فى نفسى

طيب من الأخر كده صوت الأمه سرقت موضوعى و نزلتوا على إنه إنفراد صحفى عندها و كأنه مجهود البيه محسن عيد (بتاع طلعت السادات )الى سيبينوا فى الجرنال سبوبه

أنا هحكى إيه الى حصل من الأول عشان تفهموا و عشان انا لسه دخله بيتى و مش مصدقه الى حصل

إمبارح لقيت صوت الأمه منزله موضوعى بالملى مع بعض التلفيقات و الحبشتكنات الغير صحيحه طبعا و طبعا ده طبيعى لصوت الأمه المهم تبيع و يلعن أبو الحقيقه

اول ما شفت الموضوع كلمت وأئل الأبراشى الى قعد يعتذرلى و يقولى بالحرف ( أنا عندى الشجاعه إنى أقول إنه إتسرق و هنزلك إعتذار و أنا أسف و أنا هعاقب الصحفى الى عمل كده و ياريت تيجى تقابلينى يوم التلات الساعه 7! ماشى قلت ماشى )

أنا لسه دخله حالا البيت الساعه 9 أولا رحت إستنييت ساعه فى إنتظار سعادة البيه وائل الأبراشى و شوية صحفيين أقل ما يقال عليهم إنهم حثالة جم قعدوا جمبى يتعرفوا عليا الى يقولى "إنت الصحفيه الى إحنا سرقنا منها الموضوع؟؟ " و الى تقولى إنت إيه الى مشغلك فى البديل ده جرنال مبيبعش تعالى إشتغلى معانا!!ا.. و الى تقولى ما هو ممكن يكون نقلوا من على النت وده عادى يعنى!...

و لما إستعجلت السكرتير عشان أدخل الميعاد لأنى بقالى نصف ساعه فى إنتظار وائل الأبراشى واحده جت تقولى و (إيه يعنى ما تستنى ساعه كمان ده إنت هتقابلى وائل الأبراشى ) !( و الله العظيم ده إتقالى )!!!!!! للأسف للأسف أنا مش عارفه أهلى ربونى ليه كان نفسى أشتمهم واحد واحد كل الى نزل عليا أقوله دى مش مواعيد المفروض يحترم الميعاد الى هو محدده! و قعدت إنتظرت كمان ساعه و فى الأخر لقيته نازل على السلم إفتكرته جاى يعتذرلى مخصوص لقيته عدى من قدامى و مشى !!!! قلت بصوت عالى دى قلة أدب يعنى سارقين منى الموضوع و كمان مش بيقابلنى لقيت واحد كده همسله فى ودانه و قاله دى سهير أباظه و أنا كنت خلاص وصلت الشارع لقيته بيقترب منى بيقولى أنا أسف محدش قالى إنك جيتى !!!!( أنا بقه فى مخى نعم يا خويا؟؟؟؟!!) قلت له إزاى إزا السكرتير مكلمك قدامى قال لى و الله أسف و أمام إعتذاره سكت قال لى أما بالنسبه للموضوع ف أنا تأكدت من حسن نية الصحفى و إنه مكانش قصده!!!!( تانى نعمّّّّ!!! تخبط فى دماغى) قلت له حضرتك فى حاجات مسروقه بالنص ده غير الصور الى أنا مصورها بالكاميرا بتاعتى!!و الصحفى بتاعك لو درس صحافه هيعرف إنه يجب الأشاره للمصدر ده لا أشار للمصدر ولا كلمنى إستأذن و كمان سارق الموضوع ) ( و الى عرفتوا أن الصحفى ده بيشتغل فى الجرنال عشان خاطر بيجيب أخبار طلعت السادات طازه لأنه شغال عند طلعت السادات و كل مواضيعه عن طلعت السادات )
قال لى أنا أسف هعمل تنويه على إنك الى مصوره متخفيش أنا مش هسرق حقك الأدبى هنزل إسمك إنك إنت الصورتى الى حصل ده فى العدد القادم و قال لى أنا أسف يا سهير أنا متأخر على حفلة النقابة ( بتاعة عيد الصحفى) و ركب عربيته و مشى !!!!! طيب د يتقال عليه إيه؟؟



يتقال إيه بجد ؟؟؟؟

وائل الأبراشى الى بيطلع علينا فى التلفزيون يقول انا الحقيقه و الحقيقه انا أبعد ما يكون عن الحق و الشرف و له سوابق طبعا فاكرين رشا و الى حصل معاها؟
http://ay7aga.manalaa.net/node/23

حتى بعد الى حصل لرشا قال لرشا ( إنت عارقه إن الصحفيين بيستسهلوا! يعنى هو يعلم إن الصحفيين الى عندوا بيفبركوا و مبيشتغلوش صحافه على قد ما هما بيشتغلوا فبركه و سرقه صحفيه) و حتى بعد الموضوع ده قلت دى هفوة من صحفى حمار و بيستسهل ماكنتش أعرف إنها سياسه و إنهم جرنال لا بيفهم فى الصحافه ولا بيعرف غير الصحافه الى بتشهر بالناس و قائمه على الفضايح بالأساس

أنا قعدت شهر أعمل الموضوع! و ده جه سرقه لصالح الناس الى كنت فاكراهم مثال للشرف و الأمانه و هما حثالة الصحافه و أحقر من اللواءات بتوع الريس على الأقل كرم جبر زباله و معروف إنه زباله على الأقل ممتاز القط منافق و كل الناس عارفه إنه منافق لكن دوول منصبيين نفسهم رؤساء مجلس إدارة الحريه و العداله فى مصر و هما أحقر من أى كاتب بيكتب فى جريده حكوميه

فى النهايه محسن عيد مبروك عليك هدايا طلعت السادات و مواضيعه
http://id3m.com/D3M/Writers.php?Show=2305
ده لينك لكل مواضيع محسن عيد الى كلها عن طلعت السادات ماعدا الموضوع بتاعى الى عن المستشفىو التقرير الى كنت كتباه عن الأطباء و الفلوس بتاعة السفارة الفنلندى بردوا نقلهم منى
و كاتبهم كأنهم سبق فى موضوعيين!

وائل الأبراشى مبروك عليك الزعامه الوهميه الى إنت صانعها لنفسك

بجد انا ماكنتش عايزه أتصدم فى الناس الى كنت فاكراهم حاجه كبيره و فجأه تلاقى ده وهم فى خيالك بس

مش عارفه أقول من ساعة ما روحت غير
حسبى الله و نعم الوكيل

مشهد أخير : قبل ما أركب و أمشى لقيت راجل جايلى بيقولى أنا كنت جاى بشكوى للجرنال هنا عن الحاله بتاعتى بس خدى إكتبى إنت عشان أنا سمعت الى حصل دلوقتى و قرأت موضوعك فى البديل .. إنت واحده محترمه و أنا عايزك إنت الى تتكلمى عنى
و أخد نمرتى و مشييت

كان فى واحده و واحد بس قابلتهم فى الجرنال كانوا محترمين معايا واحده إسمها رحاب الشاذلى و واحد كان بيتكلم و رئيس قسم التحقيقات بتاعهم كمان الى تبراء من محسن عيد و قالى فى مكالمته بعد المقابله إنه أسف و واحد صعيدى كمان بس ناسيه إسموا كانوا محترمين و عملونى بكل إحترام


من أول ما إبتديت أتدرب و أنا بأمل إنى ما أتصادمش مع حد من الصحفيين

بس مش يإيدى

أنا مش هسيب حقى و الله ما هسيب حقى

الموضوع بتاعى فى البوست السابق