أول مرة أسمعع فى مظاهرة كلمة " أثبت" كانت يوم 25 يناير
إزاى يوم يغيرنا كده ؟
مشهد
قنابل غاز مسيل للدموع أجرى أنا و محمد المعتصم و أبو مى و أمها الى طلعت حرب و انا بكلم نفسى
مش قادرة أتنفس
مش قادرة أتنفس
بعد ضربنا و العودة الى ميدان التحرير اهتف مع مجموعة من المتظاهرين محدش يمشى محدش يمشى
يتقدم نحوى خالد البلشى و هو يطلب منى شال ليمسح عينيه بعد ضرب عساكر الأمن المركزى لنا بالغاز المسيل للدموع و يقول بطيبة و هدوء شديد و هو يمسح وجهه : محدش هيمشى يا بنتى محدش هيمشى
مصدقتوش معرفش ليه بس مصدقتوش بصيت حواليا لقيت الناس بتفرش على الأرض و بتقعد
مشهد
سهير : إيه ده يا معتصم؟
معتصم: مش عارف
سهير: حلو.. حلو شكلنا حلو أوى كلنا
محمد فوزى : بصى يا سهير دى نمرة مراتى هى حامل طمنيها عليا كل شوية أنا مش مروح
مشهد
عساكر الأمن المركزى يقومون بسحق الشباب و ضربنا حتى ميدان طلعت حرب
تصرخ بنت لا أعرفها يا خونة يا خونة ( تشجعنى على شتم العساكر بعد ضربنا )
أصرخ يا خول بتضرب مره بتضرب ست؟ كلكم خونة يا يا خونة
مشهد
أسمع لأول مرة فى المظاهرة(الشعب يريد أسقاط النظام) ابكى.. كان يوم حلو كلنا كنا حلوين
:)
مش عايزة اوصف تفاصيل فى المشاهد أو أطول فى شرحها
المشهد اعظم من أن يوصف , سينمائى أوى أدائنا كا مصريين , المشهد غيرنا غيرنا للأبد
ملحوظة ليكى يا حلوة :-
يمكن يا بنتى تقرى الكلمتين دول و تفتكرى أنى عملت حاجة , أنا عمرى ما كنت صف أول , الصفوف الأولى شرفها الشهداء إحنا كومبرسات
:)
أمك أيوا امك انت
0 comments:
Post a Comment